Turnerfahrt

Oberländisches Turnfest Wilderswil

 

 

Turnerfahrt 1997

8. Mai 1997

Am achti si wer ufem Poschtplatz Gsteig zäme cho. Me hät sich gägesitig begrüsst. Wo du alli da si gsi, si wer rechtig Bäre, da si wer wieder emal nit verbi cho oni öppis ga z'ha. Item, me hät du da frühizitig z'Nüni gno,chame e so säge. Hebel, dä hät grat dr Tschägpot knackt u das Turnee überno, Merci no... Mu hät scho dr erscht Schnupf probiert, anderi scho es Schnäpsi, ja nu, es hät ja nüt gschat. Langsam aber sicher si wer usem Bäre. Stefan u André, si hei das Türli organisiert, hei grat churz erklärt wo wer hen ga. Die zwö ältere Herre, Üelu u Chrigel hei dr chürzer Wäg unter d'Füess gno, wo die andere gäge Topfel uehi si glofe. Tönu Brand esch da emel no anes Bächli ahi ga "Rückwärtschöüle", d'Grippe hät ne apa verwütscht oder süscht es Lide. Bem Topfel a cho, hät mu no öppis wenigs "gschnabuliert". Murat (M. Schopfer) isch apa uf Diät, er isch am Bifidus trinke, was mu be ihm net all Tag g'seht. Schliesslich esch me emel de witer glofe bes e d'Rüsch. E paar si no zu "Wale" öppis ga trinke, die andere si dür d'Strass usi, u be däne wa n'iech o be gsi, si übere Grüenbärg rechtig Nüwhuses-Vorschess. Benere Hütte hei wer z'Apéro gno, die einte hei Wy umgä, die andere Pommes-Chips, es esch eifach e Pracht. Schliesslich hei wer dr läscht Teil en Agriff gno. Über Stock u Stei si wer zu Nüwhuses-Vorschess glofe, da acho, si sie scho am bänkle. Me hät de da Raclette g'ässe oder hät chöne grilliere. A Geischtlichem hät's net gmanglet. Am Namittag hät mu er Hütte Spiel gmacht u es paar si uf enes Bödeli ahi ga stöckle. Gäge Abe si wer de no e z'Gsteig ahi glofe u die wa no hei wälle si no e Sanetsch ga z'nachtne. Trotzdäm, dass Schnee hät kabe u z'Wätter net ganz guet esch gsi, hei wer's glich luschtig ka. Vela Dank a d'Organisatore...

Christof Walker

Zurück

 

 

Oberländisches Turnfest Wilderswil 1997

21./22. Juni 1997

Bombe-Stimmig, scho am Morge, u ich darf scho der Brecht schriebe, dass chunt ja guet, muess i säge! Am 8.00 Uhr si wer mit der Post nach Gstaad zum Bahnhof. Nach churzer Begrüssig va de Gstaader Turner si wer mit em Zug nach Zweisimme u näher nach Wilderswil g'fahre. Z'Wätter cha nit schöner sie, es rägnet... Wo wier e Unterschlupf g'funde hei, für ünses Gepäck, hei wer z'Gländ e betz a guget u näher am 12.00 Uhr i turnet. Jetze geit's los, zerscht Gymnastik, nit schlächt hät mi ducht, usser't dass Häsel z'nägschta Mal vellecht nit a Bode müessti. (Lawer di Detail). Weiter im Text, wir kommen zum Next. Gerätekombination steit als nägscht's uf em Programm. Wier hei alze uf g'stält u i turnet. Achtung, es geit los... nit schlächt, nit schlächt... aber Kampfrichter heis es betzi anders a g'luegt, es 6.91 hät's gloubeni gäh. Ja nu, vellecht hei wer ir Liechtatletik meh Glück...Da het z'Peti e chlei g'junget u Pele liecht g'altet, e so si wer nit schlächt gsi. Für z'Peti het fige u für Pele het Tom d'Liechtathletik g'macht. U jetze si wer scho bald am Ändi vom Turnerische. U nähär si die einte ga bade, die andere si no ga Turne luege, u nomal anderi hei scho e Bombe g'startet. U e so hät's apa tönt: "Zur Mitte, zur ...! Lawer's jetze. Am Abe si wer de nach Interlake ga z'nachtne mit apa 3-4 Froue vom Dameturnverein, e chlei wenig, oder? Jeda hät das gno, was är hät wälle ässe u trinke. Nachem z'Nacht heiwer uf z'Mal a fa singe u jutze wie dr Jodlerklub. Joholiduli... gäll Peti ? Es hät mi schad ducht scho bald müesse z'ga, es isch nämlich gmüetlich gsi, aber jetze. Nähär z'Wilderwil, da herrscht scho Bombe - Stimmig, z'Fäschtzält isch platsch voll wie Bar och. Wier hei nus im Fäschtzält under gla. U da sie scho alli uf de Tische gsi u hei g'fäschtet was si hei möge, leider sie du es paar Tischa kaputt gange. Mario hät sich uf z'mal anere Sprinkleralag a gmacht u Fige ar Pfündu. Wir hei g'fäschtet bis i die frühie Morgestunde... E chlina Teil isch e d'Unterkunft ga lige, es paar sie e z'Schuelhuus , eina be de Velo, die andere im Luftschutzchäller, u zwö hei sich uf eme ne Balkon nider gla, u hei z'Ganza vo obna a g'gluegt. Am Morge hei de Fige u Mario e chlei Abstand gno vor Pfündu u vo dr Sprinkleralag, wo si weder e chlei nüechterer si gsi. Am Morge hei es paar strub us g'seh, wier hei no öppis g'ässe, die andere si no nach Interlake e Mc Donald. Am spetere Nahmittag si wer du ufe Zug u da hei si uf z'Mal es Schnupfvärsli a fa dichte. La Grenouille, der Frosch , La Vache, die Kuh, beide sind meistens zu.... Wir si met em Zug nach Spiez, Zweisimme u näher nach Gstaad g'fahre, u va Gstaad richtig Gsteig mit em Postauto. Underwäge hei wer no g'sunge u g'jutzt bes nus z'Stimm hät verseit. (Am Mentig hät mi dr Chef o g'fragt ob i verchältet sigi?) Im Gsteig hei wer no e Umzug g'macht wi üblich u näher i Bäre, u da si wer du na dis na heimwärts gange. Vela Dank a alli wa hei met gmacht.


Stefan Walker

Zurück