Kantonalturnfest Alpnach, Kerns, Sarnen 2000

Turnerfahrt 2000

 

 

 

 

Kantonalturnfest Alpnach, Kerns, Sarnen 2001

24. / 25. Juni 2000

Opa am 10.00 siwer met zwöi Richebachbössli gstartet, vo hie si wer richtig Gstaad gfahre u hei underwäge no d'Feutersoeyer glade. Näher si wer richtig Brünigpass u hei da umha am Strasserand e churza Halt gmacht, um uf die andere z'warte. Derna si wer direkt nach Sarne g'fahre, wo du o schlussäntlich ünses Ziel vo där Fahrt isch gsi. Apa um Mittagszyt si wer grat acho u hei im grosse Zält z'Mittag g'ässe. Nach em Mittag si wer no chlei ga z'Gländ aluege u scho bald hei die erschte a fa turne.Es het agfange mit Liechtathletik, wower di paar Diszipline hei gmacht ka, esch ünsi Gruppe e Turnhalle gange, u hei da nus e bez igwärmt, für ünsi Üebig. Wir hei dr Barre zu Tramp ufgstellt,i gloube wir si z'friede gsi mit dr Üebig. Wo du aber eigentlich alls Turnerische isch verbi gsi, hetmu scho wieder mit Fröide a gmüetlich Teil gsinnet, dä isch du oh net z'churz cho. Aber z'erscht si wer ünsi Schlafbaragge ga irechte, u was du het g'heisse, es sigi e gmischti Duschi, isch du der eint u dr ander gäre gane Duschi gniesse, oder d'Froue. Näher si wer emal ga z'Nacht ässe u derna si wer i die verschiedene Bari ga suffe, abaggere, rede, tanze uf de Tischa u süsch no Sache. Die einte heis no lang verlitte, die andere si du ga lige.

Am Morge wieder z'glich Speli, wo eina isch cho u het gseit, es sigi eini am dusche, so si wieder es paar ahi gsecklet... Item, wir si du afe emal öppis ga z'Morge ässe i d'Güggelfarm. Es het Pommes-frites u Poulet gä. Da hei wer du och eigentlich ünsi Sunntigsbombe gstartet. Kaffi Luz, eis nach em andere, jeda het a däm grosse Tisch e Rundi zahlt, we net zwo! Wir heis gmüetlich ka. Si hei nus zwar mängisch blöd aguget wo wer hei gsunge, aber si hei fröid ka a nus. Es si du no zwö a ünsa Tisch cho, Chrigel es Lied hei gwidmet: ....du altes Arsch... was mu du noh eigentlich dr ganz Tag no het ghört. Uf em langsame Rückzug hei no es paar öppis z'trinke, es Souvenir oder anderi es Verkehrsignal mitgno, es het emel öppis z'lache gä. Das Signal esch du mit nus bis iz Gsteig cho. Vor em Bäre hei wer no es Gläsi Wy gno, u die wo hei wäle, hei no öppis g'ässe, so isch du dä Abe oh vergange, u wir si du bald emal heim. Danke velmal für die was organisiert hei u für die wo si mitcho, es isch es Super Fäscht gsi.

Reto Neuhaus

Zurück

 

 

Turnerfahrt 2000

1. Juni 2000

A däm wunderschöne Uffahrtstag hei sich uber trissg Gsteiger Turner uf em Poschtplatz besammlet. Nach däm du o di lätschte si zuha trollet si wer du i nes paar Pewes uber d'Pille gfahre u hei di Chäre uf em Parkplatz näbem La Pote parkiert. U si wer du losgloffe richtig Col de la Chrütz . Zerscht e Stück dr Passstrass entlang u du näher nachem erschte scharfe Cher em Wanderwäg na z'Bärgli uf. Mu isch da gmüetlich glofe , di einte chlei ruhiger u di andere e biz schnäller. Dr zue hät mu gugget, gschwätzt u no öppis blagiert. Nach emne Wili isch du di erschti Pouse naha gsi. Da si du oscho di erschte Fläschi gleert worde. Item, mu isch de o umi witer. Obna, fascht uf em Pass, hei zwö därewäg gschwitzt ka, dass si du grat e Abchüelig hei brucht. Doch oni sone grosse Gaasche häte si wol da Sprung i dä chalt u träckig Misttümpel nid gmacht. E wari Freud isches gsi, däne blute Bursche zue zluege ( immel für die vom andere Ufer, wohlverstande ). Di zwö hei sich du tröchnet, Bärgschue montiert u du isch mu umi witter. Bim Beizli uf dr Passhöhi häts für es paar scho grat dr nägscht Halt gä. Vo da us si wer witter uf e Meilleret-Grat, u dm Grat na no e Stück fürhi zum ne schöna Platz für d'Mittagspouse marschiert. Und die Kamele lagerten sich. E schöni Ussicht hät mu ka, warm isches gsi u ging no blaua Himmel. Di Hungrige hei sich du uf d'Holzsuechi gmacht u z'Gfundena zum ne brava Hufe bige. Zunstüdleni, dürri Gruzeni u alz Müglicha isch da dr bi gsi. Si hei di Bigete azündet . Nach däms e chlei Gluet hät gä, hät du o dr kulinarisch Teil chöne afa. Da si ra Servala, Bratwürscht, Gotlett u no anderi Sache uf dr u zwüsche dri o ir Gluet uf jedi Art u Wis bräglet worde. Nach däm du all si gsättiget gsi, isch mu im Züg uma plägeret u hät di gfüllte Ränze la verdoue. Di einte hei dr zue gjasset, di andere öppis gschwätzt oder si süscht ir Sunne gläge. Nach däm die Mittagsrascht o dem Ändi zue isch gange, hät mu afa zämepacke u ufrume u di läschte si nach ihrem Mittagsschläfli erwachet. U es paar arm Cheibe hei bi där warme Sunne finebiz e Sunnebrand zämegläse. Ünsa Wäg isch du witter gange richtig Les Mazots, u vo da furt dr Schipischte na gäge z'Diablere zue. Witter una isch es du es paarne (mier o) z'längwilig worde schön dm Wäg na z'loufe u hei z'Gfüel ka es gangi ringer dr Bahnschneise na, quer Feld ein dür z'Giät ahi. Wir si du nach diverse Stürtz mit verchratzete Scheichi una usem Wald usa cho. Bim Parkplatz si wer wider all zäme cho u si i z'Ormona ga dr Durscht lösche. Nach däm du di Pflicht o isch erfüllt gsi isch es uber Pille zrugg i z'Gsteig gange. Im Bäre hei wer mitenand no öppis gschpiise u derna isch du dä Tag o langsam fertig worde. U nes witers Uffahrtstürli hät dr Vergangeheit aghört.

Andreas Kubli

Zurück