Turnerfahrt 2011

Turnfest 2011

 

 

 

Turnerfahrt 2011

 

 

Es isch e näbliga Uffartsmorge gsi, doch das het nus d’Fröid nid gno u so sy wier Turner mit Chrigel u Dirk uf e Pillon gfahre, wo ses du nüme so vil Näbel het kabe.

Vo da us si wier richtig Retosee gloffe u witer gäge Chalet Vieux. Ufzmal hei du d Jäger under üns afa spiegle u o di andere hei si schnäll gfunde: A mehrere Häng si ganz vil Steiböck gsi! Wier hei nus di Ziit gno si a z’gugge will so öppis gseht mu o nid all Tag.

Je witer wier si gwanderet, desto prächtiger isch es worde u du hei wer gäge z Gsteig ahi es Näbelmeer gseh, das isch de schön gsi. Uf em Pass obna, hei wer Znüni gno.

Wo wier dr gröscht Durscht u Hunger stillt hei kabe si wier witer richtig Plattipass uehi trottet wo Zmittag isch planet gsi. Die Muetige si du über z „Hüri“ u die wo lieber nid iz Stoziga hei wäle si unadüri u bim Obera Stuedeli verbi zum Plattipass glöffe.

Wier wo una düri si, si du schnäller gsi u so hei wer du afa füre. Mit em Rouch hei si nus bald emal gseh u hei o grad wäle z Fleisch druf tue. Wo du d Mäge alli si voll gsi, hei wer no e chli Charti gspillt u heis ses gmüetlech ka. Wo d’ Wolki si dünkler worde hei wier ünser sibe Sache packt u hei dr schnällst Wäg vom Topfelsbärg ahi i Schöne Bode igschlage.

Vo da si wier em Wanderwäg entlang über d Fure iz Gsteig ahi gspaziert. Wo du dä Wanderwäg am „Bäre“ isch verbi gange, hei di meischte Blicka da düri gugget. Wier hei nid lang zörgeret, so sy wier dä glungnig Tag da ga abschliesse.

Merci vil mal Chrigel u Dirk wo nus hei id Rüsch gstellt, merci o Stefan für dä glungnig Tag z Plane u allne Turner wo hei mitgmacht.

 

Neil Romang

 

Zurück

 

 

Toggenburger Turnfest 2011

 

Am früehe morge het sich der ganz Turnferein uf em Postplatz im Gsteig besammlet, die einte fit u di andere no ganz vershlafe. Wode oh di letshte si itroffe simer richtig Gstaad gfahre, und bir Wispile hei mer no d‘Louener im Car mit gno. So ändlich kompllet!  Jetz geitz los richtig Toggenburg. Es momäntli underwägs heimer de e zmorgepouse gmacht. Es Kaffi het gloub allne guet ta :D Nach eme bitz streke u rütle simer du witergfahre. Ändlich z‘Toggenburg ah cho ish grad direkt witer gange mit uslade, uf e richtige Zältplatz, und schlussentlich üsii Zält ufboue. Ude heimer scho de erst Wettkampf ka. Gerätekombination isch üs supper glunge, mir sie zwar nid di beste gsi, aber mir sie stolz uf üs.
Dernah heimer e churzi pouse gmacht u sie de no ga Liechtatletik mache.
I gloube oh da simer alli zfride gsi! Womer alli Wettkämpf verbii hei ka simer gmüetlich i d‘rundi gohocket u hei alli zäme öppis trunke.

Ner isch es scho Zit gsi zum dusche, anders alege u ner ga znacht ässe, da hei sich alli gfröit druf.Für ga zässe si mer alli zäme gange, eifach als abshluss vom e ne glungene tag. Nach em gmüetliche ässe si mer chli ga luege wo das mer üse durst chönnte ga stille, die einte si a ne bar di andere zum wiistand. So hei sich ünser wäge langsam trennt, für dä abe. Am morge am 1 hetme de bemerkt das es paar zält dernüelt sie worde u sache sie furt cho, bi es paarne hets grad kriselet, aber das cha bi jedem Turnfescht passiere u es het zum glück jede sini wärtfolle sache bi sech ka.  Nachere länge nacht u churzem schalf geitz de no a Fahnemarsch, wo leider ünsi schöni Fahne es loch het übercho. Nach dem hei mer nes scho bald wider gäge heim bewägt. Wider alli im Car verstout di einte schlafend, di andere gmüetlich, u di andere no mit de volge vom abe J Womer du de ändlich im Gsteig sie ah cho, hei mer no üse tradizionelle umzug dür zdorf gmacht bis zum Bäre. Es paar si scho heim gange sich ga usruehie und die  andere hei das Turnfescht mitemene feine ässe la usklinge. Verletzige hets zum glück keni gä, ussert es paar schürfiige.

Jetz folgt bald znägste Turnfest u alli
freue sich scho wider riisig druf.

Petra u Melanie

 

Zurück