Turnerfahrt 2012

Turnfest 2012

 

 

 

Turnerfahrt 2012

 

 

Teilnehmer: Die wa derby si gsi wüsses no, oder heis glöscht...

E prächtig schöna Meietag isch worde, äs het 5° under Null ghabe u d’Bärga si frisch verschnitt gsi u der Salat em Garte het e tolla Riffe müesse erlide...

Z’Lädeli em Dörfli het o das Jahr der Tagesumsatz ere knappe halb Stund gmacht – vom halbi bis am achti am Morge. Die wo kener guete Bitzeni deheime hei ghabe, si zum Peti u hei eint u andersch – meh oder weniger schlaus igchouft. Nach em Begrüessigsritual siwer du mit em Taxiundernähme „Hebresi“ gägem Ormund zue gfahre. Em Hebi si „Masterplan” het gluetet: Va Vers l’église ufene Geisart nach Ollon z’grate…Äs isch no relativ frisch gsi dä Morge, u z’Isch u der Riffe hei nüwis Müehi ghabe ufztoue. Nach emene churze „Highspeed Warm-up“ heiwer oberhalb vo des Aviolats müesse z’Nünene, di einte mit Gaffi u di andere mit Quöllfrisch. Mu het umhi afa loufe da hät Sandro afa himpe. Siner frische Blaateri heiwer provisorisch met Pflaschter dokteret u d’Schueh derna erornig gnüscht...

Ds Richärti isch als Tempomacher ging flott vorus gstaabet, u het e gueta Spürsinn ghabe für Abchürzigu. Michel uf em GPS u z’Hebi uf der Charte hei du albe di umgsetzti Absicht va Richard bestätiget... u z’ok gä. Nach La Forclaz isch mu uf emene zum Teil äs bitzi usgsetzte, spannende Wägli ar Nordwestflangge vam Chamossaire, mit meh oder weniger guetem Schuehwärch underwäge gsi. Alta, herta Louischnee het nus emene Couluäri fasch zum umchehre wäle zwinge. Mit Bedacht u ufenand passe, heiwer du di Schlüsselstell indernus bracht u si definitiv am „Point of no return“ aglangt...

Amene Wägwiser heiwer gläse äs sigi der „chemin de l’eau“, hei wer doch fines paar Fassigu va Quelli für Ollon gseh. Churz vor Plambuit, i nime scho a e jeda wüssi wa das sigi, isch mu naha gsi für z’würschti. E churze Züge si ar Gluet meh oder weniger edli Bitzeni am schwitze gsi. Z’Rüedi u Michel hei uf Cherze-Raclette-Öfelene à la Tom Schild, irer Liebspis gfrönet. Z’Richärti het gmeint: Hmm, e gueta Bitz Fleisch geit och...

Nach däm Murks vam z’Mittagne, het sich der Schriberling äs bitzi gleit u het zu Wort wi „muesch 21 zeige“, „pris“, „e zwänzger mues es si“ churzum va Zägge u andere Vicher afa tröimere... Wa di gröbschte „Diräktzahligu“ si under Tach u Fach gsi, isch mu witer Tappet, zum Teil tout-droit dür prächtiga Buechewald. Äs „Schmierpatroulliepäärli“ het nus uber Abchürzigu ke Uskunft chöne gä, wir hei du halt, wohl oder übel, äs bitzi spekuliert was di zwöi ächt uf Plambuit triebt.

Z’Panex het’s du scho afa gnüegele, u Ollon isch definitiv gstriche gsi. Derfür isch mu Schnuerstracks zum Teil de Gleise u Räbi nah gäge Aigle gstaabet. Ünsa Tempomacher het ufem Terrässi vam Buffet de la Gare, bere Stange umene 3/8 du blanc z’fride gwartet...Äs isch eifach plaisierlich wemu mit allergatig Lüt e ganza Tag cha plagiere, philosophiere, läschtere u z’fride, ohni z’prügle, umhi zäme Heim zue geit! Hoffentli geit di Tradition no witer.

Merci Hebi für z’organisiere, u allne wa hei teilgno.

Daniel Trummer

 

Zurück

 

 

Oberl. Turnfest 2012

 

Nach langem Üebe u Istudiere hei wier nus am 16. Juni am sibni am Morge dörfe ufe Wäg ids Gstaad mache. Es bitzi ufgregt hei wier nus ali im Gstaad vor der Halle troffe. Nachdäm sich ali vor Gräte-Kombi anders agleit hei, siwer gmeinsam id Halle gloffe. Währänd däm d Zwöisimmner iri Kombi zeigt hei, isch önsa Name ufgrüeft worde u wir hei nus afah parat mache. Uf der Tribüni hets no nid viil Lüt ka. Wier hei also no nid viil Zueschouer ka.

Wo wier öns parat gmacht hei ka für önsa Uftritt, siwer uf Startposition. D’Musig hett agfange u wier hei nus afah bewege. Wier hei nus ali sehr guet gfüehlt. Nach önsem Uftritt siwer ali zemecho u hei no önsa Insider-Handschlag gmacht. Wo wer us der Halle gloffe si, hets gheisse, dass wier öns vor der Halle träffe. Wider ali Gsteiger u Feutersoeyer uf eim Huufe versammlet, hei wer z Programm vom hütige Tag besproche. Ab jetz siwer nemme ali mitenand underwägs gsi. Die wo Liechtathletik gmacht hei si in Richtung Flugplatz gloffe u si ihri Stärchine ga mässe; die wo hei müesse hälfe, si a ihre Isatzort u die wo nümme hei müesse (dörfe) mache hei sich ufem ganze Turnfeschtareal vertörlet. Nach der Pendelstafette isch mu gmeinsam öppis ga trinke u hetts luschtig ka. Nacheme lange Wettkampf si wer ga dusche u hei nus ufe Wäg zum Feschtzält gmacht. Dert hei wer zämä zmittagnet. Es isch übrigens e sehr heissa Tag gsi. Därum si es paar vo öns nachem Ässe ids Friibad glüffe u hei sich dert abküehlt. Wier si ali verteilt underwäge gsi. Drum isches es bitzi schwirig z schribe wär was gmacht hett.

Da wier i önsere Heimat si xi, hei wier nus o däm entsprächend aaständig müesse benäh. Derför mache wer de am nägschte Turnfescht d’Stadt Biel unsicher. Aber i weiss, dass wers alli sehr guet hei gha u de Tag richtig gnosse hei. Am Abe isch apa jeda i Usgang. I bi leider nemme lang derbii gsi, wüll i ja no di jüngschti bi xi u bald e mal ha müesse heim ga. I ha dä Tag aber trotzdem sehr gnosse u wier hei ali dörfe stolz uf nus si.

Am nägschte Morge isch gloubeni der eint oder ander no ned e so schnell usem Bett respektive usem Zält oder Wohnwage gumpet.


Jana Perreten

Zurück