Turnfest 2014

 

 

 

Turnfest 2014

 

Mit viel Motivation hei wier bis am 21. Juni trainiert für ds Turnfest z Toffe. Ufem Postplatz Gsteig heiwer nus dennd am Morge früehi troffe. Wo alli e Platz imene Outo hei ka, hei wier nus ufe Wäg uf Toffe gmacht.
Wier si ganz lieb vo Peles Familie begrüesst worde u hei öns i verschiedene Zält u im Garage dörfe iirichte.
Dernah isches scho zit gsi, richtig Feschtgländ z marschiere.
Nachdäm sich ali vor Gräte-Kombi anders agleit u igwärmt hei, siwer gmeinsam id Halle gloffe.
Dr Räscht vom Turnverein u ünsi Zugchrücke (d Jana) hei dörfe zueluege.

Wo d Musig ahgfange het, isches still worde u d Gräteturner hei afah Turne.
Nach önsem Uftritt siwer ali zämächo u hei no önsa Insider-Handschlag gmacht.
D Erliechterig nachem Uftritt isch gross gsi.
Wier hei nus wider anders ahgleit u si i ds Feschtzält ga Zmittag ässe.
Mit vollem Mage hei wier besproche was a disem Tag no gmacht wörd.
Ab jetz siwer nemme ali mitenand underw&aml;ge gsi.
Die wo Liechtathletik gmacht hei, si sich langsam aber sicher gah ufwärme u hei sich a di verschidene Pöschte verteilt.
D Liechtathlete hei volle Isatz zeigt. Müed siwer zrog zu önsem Träffpunkt gange u hei önser Leischtige gfiiret. Wier chöne nämlich sehr stolz uf öns si.

Nacheme länge sportliche Tag, si wer ga dusche u si när bi Pele u sire Familie ihglade gsi zum Znacht. Uf das sehr feina u vila Ässe, siwer de wider e mal ufs Feschtgländ zrog gange.

Wier si ali verteilt underwäge gsi. Drum isches es bitzi schwirig z schribe wär was gmacht hett. Mier hets sehr gfalle i däre Gruppe woni bi gsi.

Aber i weiss, dass wers alli sehr guet hei gha u dä Abe richtig gnosse hei.

Wo du alli am nägschte Morge erwachet si, isch scho ds Zmorge ufem Tisch gschtande. Die wo öppis hei welle ässe hei öppis gässe, u die wo net hei welle oder chöne heis lah si. Es paar vo ünsnse Turner si bi Pele blebe u hei sini Sauna gnosse u die andere si no chlei uf ds Turnfestareal.

Im spetere Namittag hei wier nus bi Pele besammlet, hei no chlei ufgrumt u si weder rechtig Gsteig gfahre.
Im Bäre hei wier z Turnfescht la usklinge.

Mis erschta Turnfescht het mier sehr guet gfalle.

I danke Pele u sire Familie für die liebi Gastfröndschaft.

Fabian Walker

 

 

Zurück